गुगल फोटोजमै अब ‘म्याजिक इरेजर’ फिचर, तस्वीरमा भएका अनावश्यक कुरा मेटाइदिने

  गुगलले सन् २०२१ मा पिक्सेल सिक्स सार्वजनिक गरेसँगै पहिलो पटक त्यसमा म्याजिक इरेजर फिचर उपलब्ध गराएको थियो । अब भने म्याजिक इरेजर फिचर गुगल...

 

गुगलले सन् २०२१ मा पिक्सेल सिक्स सार्वजनिक गरेसँगै पहिलो पटक त्यसमा म्याजिक इरेजर फिचर उपलब्ध गराएको थियो । अब भने म्याजिक इरेजर फिचर गुगल फोटोजमा पनि प्रयोग गर्न सकिनेछ ।

गुगलले बुधबार आयोजना गरेको 'गुगल आई/ओ' कार्यक्रममा कम्पनीका प्रमुख कार्यकारी अधिकृत (सीईओ) सुन्दर पिचाईले उक्त फिचर गुगल फोटोजमा ल्याउन लागेको घोषणा गरे । यो फिचरका माध्यमबाट फोटोमा भएका कुनै पनि अनवाश्यक कुराहरू क्षणभरमै हटाउन सकिन्छ ।

त्यस्तै कुनै फोटोमा आधा वस्तु मात्र देखिएको छ र केही फ्रेम बाहिर छुटेको छ भने गुगल फोटोजमा उपलब्ध हुने म्याजिक इरेजरका माध्यमबाट छुटेको भाग रिकभर गर्न सकिने छ ।

उदाहरणका लागि मान्नुस्, तपाईंले हात फैलाएर फोटो खिच्नुभएको छ । तर, फ्रेमभित्र तपाईंको आधा हातमात्र पर्‍यो । त्यस्तो अवस्थामा म्याजिक इरेजरले फोटोको गुणस्तर, ब्याकग्राउन्ड केहीलाई पनि असर नगरेरै फोटोमा छुटेको भागलाई फिर्ता ल्याउनेछ । अर्थात् फोटोमा नभए पनि एडिट गर्दा एआई टुलले तपाईंको फ्रेमभित्र ल्याउनेछ ।

जसरी म्याजिक इरेजरले फोटोमा भएका अनावश्यक तत्त्वहरू पहिचान गर्छ, त्यसरी नै म्याजिक एडिटरले फोटोमा कमी भएका कुरा पहिचान गरेर त्यसलाई व्यवस्थापन गर्नसक्ने कम्पनीको भनाइ छ ।

गुगल फोटोजमा मासिक एक अर्ब ७० करोड फोटो एडिट हुने गर्छन् ।

कम्पनीले यो फिचर कहिलेबाट उपलब्ध हुन्छ भन्नेबारे केही खुलाएको छैन । सम्भवतः अबको केही महिनामा उक्त फिचर सार्वजनिक हुने अपेक्षा गरिएको छ ।

पछिल्लो अध्यावधिक: बैशाख ३०, २०८०, टेकपाना